ГРАЎЖЫШКІНСКІ КАСЦЁЛ СВЯТЫХ АПОСТАЛАЎ ПЯТРА І ПАЎЛА размяшчаўся ў цэнтры вёскі Граўжышкі Ашмянскага раёна Гродзенскай вобласці. Пабудаваны ў другой палавіне 18 ст. з дрэва на месцы храма, фундаванага ў 1495 г. ўладальнікам маёнтка Мікалаем Бутрымам (адбудоўваўся ў 1640-я гг.). Закрыты ў 1951 г. (прыстасаваны пад свіран), разабраны вясною 2009 года. Побач з месцам, дзе размяшчаўся касцёл стаіць чацверыковая трох'ярусная драўляная званіца. Месца абнесена бутавай агароджай.

Помнік народнага дойлідства з рысамі барока. Асноўны зруб меў складаную планіровачную форму з выступаючымі крыламі трансепта і бакавымі званіцамі, прыбудаванай вялікай пяціграннай апсідай з бакавымі сакрысціямі. Яны былі аб'яднаны адзіным двухсхільным гонтавым дахам, які над апсідай пераходзіў у вальмавы і выходзіў на галоўны фасад вялікім трохвугольным франтонам з шырокім карнізам. Бакавыя вертыкальна ашаляваныя сцены ўмацоўвалі вертыкальныя брусы-сцяжкі і апяразваліся карнізам. У верхняй частцы сцен былі лучковыя аконныя праёмы з прычолкамі на разных кранштэйнах.

Цэнтральная частка малітоўнай залы аб'ядноўвалася з апсідай люстраным скляпеннем. Плоская столь бакавых частак падтрымлівалася двумя слупамі, сцены вертыкальна ашаляваны. Папярочная бэлька ў алтарным праёме была ўпрыгожана разным рэльефным арнаментам у выглядзе вінаграднай галінкі. Мастацка-дэкаратыўны акцэнт інтэр'ера — тры драўляныя барочныя алтары.