КРУПАВАЎСКІ КАСЦЁЛ НАЙСВЯЦЕЙШАЙ ТРОЙЦЫГалоўная »
КРУПАВАЎСКІ КАСЦЁЛ НАЙСВЯЦЕЙШАЙ ТРОЙЦЫ размяшчаецца на пагорку ў цэнтры вёскі Крупава Лідскага раёна Гродзенскай вобласці, абкружаны бутавай агароджай з трохслуповай брамай. Пабудаваны ў 1918—26 гг. з цэглы. У 1963 г. закрыты, вернуты парафіянам у 1990 г.
Помнік архітэктуры неараманскага стылю. Вырашаны прамавугольным у плане аб'ёмам з бакавымі крыламі трансепта, пяціграннай апсідай і бакавымі нізкімі сакрысціямі. У фасад урэзана трох’ярусная чатырохгранная шатровая званіца, над вальмавым дахам апсіды чатырохгранная шатровая сігнатурка. Плоскасныя фасады расчлянёны арачнымі аконнымі праёмамі з рэльефнымі архівольтамі, апяразаны шырынкавым фрызам. Прамавугольны ўваходны праём акаймаваны перспектыўным арачным парталам з круглай люкарнай над ім. Такія ж люкарны ў тымпанах шчытоў крылаў трансепта. Вохрысты каларыт архітэктуры храма ўзбагачаны паліхромнай бутавай муроўкай цокаля.
Унутры зала размежавана на тры нефы гранёнымі драўлянымі слупамі і перападам перакрыццяў — плоскіх у бакавых і драўлянага корабавага скляпення ў цэнтральным нефах. У гранёнай апсідзе і тарцах бакавых нефаў пастаўлены драўляныя неагатычныя алтары, у левы вугал прэсбітэрыя ўрэзаны амбон.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|