ЛІДСКІ КАСЦЁЛ БОЖАЙ МІЛАСЭРНАСЦІ размяшчаецца у жылым раёне «Маладзёжны», у паўночна-заходняй частцы горада Ліда Гродзенскай вобласці. Пабудаваны ў пачатку 21 ст. з цэглы.

Архітэктура храма вырашана ў стылі постмадэрнізму. Дынамічна-асіметрычную аб'ёмна-прасторавую кампазіцыю фарміруюць высокі прамавугольны ў плане неф з апсідай пад стромкім двухсхільным дахам, завершаным на фасадзе каркаснай шатровай званічкай. 3 левага боку далучаны трапецападобны ў плане ніжэйшы неф з трохграннай вежай пад сферычным купалам, закрытымі на фасадзе сценкай-экранам крывалінейнага абрысу. Кампазіцыю ўскладняе прыбудова чатырохграннай шатровай сакрысціі, завершанай васьмігранным шатровым барабанчыкам. Фасады арытмічна расчлянёны разнастайнымі па форме аконнымі праёмамі ў плоскіх ліштвах: арачныя і квадратныя, круглыя і паўкруглыя люкарны, гранёны зашклёны эркер і інш.