ЛЫСКАЎСКІ КАСЦЁЛ НАЙСВЯЦЕЙШАЙ ТРОЙЦЫ І КЛЯШТАР МІСІЯНЕРАЎ размяшчаецца ў цэнтры вёскіі Лыскава Пружанскага раёна Брэсцкай вобласці. Пабудаваны ў 1763—85 гг. з цэглы.

Першы драўляны касцёл пастаўлены ў 1527 г. на сродкі віцебскага ваяводы, старосты жмудскага М.Клочкі, у 1751 г. ўладальнікам маёнтка Адамава ваўкавыскім маршалкам Я.Быхаўцом перададзены місіянерам. У другой палове 18 ст. ўзведзены кляштарны будынак. Пры кляштары місіянераў існавалі школа, шпіталь і бібліятэка. У 1866 г. касцёл 18 ст. пераасвячоны ў праваслаўную царкву, рэканструкцыю пад якую ажыццявіў архітэктар Ф. Афанасьеў. 22.07.1880 г. ад маланкі загарэўся гонтавы дах, засталася толькі мураваная частка. У 1883—84 гг. адноўлены архітэктарам П.І.Залатаровым (выкладзены новыя скляпенні, заменены кроквенныя канструкцыі даху і пакрыццё). На касцёльных могілках 16.09.1825 г. пахаваны польскі паэт і драматург Ф. Карпінскі (нізкая капліца пад двухсхільным ганкам з надпісам «Гэта мой дом убогі»). Могілкі адлюстраваны на малюнку Напалеона Орды 1877 г.

Кaсцёл — помнік архітэктуры позняга барока. Крыжовы ў плане аднавежавы аб'ём з прамавугольнай апсідай і дзвюмя сакрысціямі. Чатырох'ярусная вежа (перабудавана ў 1818 г.) пры дапамозе ўвагнутых бакавін плаўна ўпісана ў плоскасць галоўнага фасада, якая насычана крапавана падвойнымі пілястрамі, між'яруснымі прафіляванымі карнізамі. Верхні ярус званіцы завершаны самкнутым купалам, дэкарыраваны валютамі, вуглавымі пілястрамі, другі — завершаны па гранях прафіляванымі аркамі, што надае архітэктурнай дамінанце барочную, амаль скульптурную пластычнасць. Гэтаму садзейнічаюць і высока ўзнятыя лучковыя аконныя праёмы і плоскія лапаткі ў прасценках бакавых фасадаў.

Зала перакрыта цыліндрычным скляпеннем з распалубкамі і падпружнымі аркамі, якія абапіраюцца на прафіляваныя архівольты і насценныя пілястры. Паміж апошнімі размешчаны вялікія арачныя нішы, над якімі лучковыя аконныя праёмы, аддзеленыя прафіляваным фрызам. Апсіда перакрыта цыліндрычным скляпеннем з распалубкамі, крылы трансепта і сакрысціі — крыжовымі, у тоўшчы фасаднай сцяны вінтавая лесвіца на званіцу. Размалёўка паўночнага крыла трансепта імітуе ордэрную архітэктанічную кампазіцыю.

Насупраць касцёла захаваўся барочны жылы корпус. Двухпавярховы П-падобны ў плане галерэйны будынак, сцены і цэнтральны рызаліт якога крапаваны пілястрамі, міжпавярховай карнізнай цягай. У дэкоры выкарыстаны руст, надаконны лучковы пояс, міжаконныя руставаныя лапаткі. Калідор перакрыты цыліндрычным скляпеннем з распалубкамі, тыпавыя келлі — крыжовымі. На першым паверсе паўднёвага крыла знаходзілася трапезная.