ПАГОСТ-ЗАГАРОДСКАЯ КЕРАМІКА — ганчарныя вырабы майстроў з вёскі Пагост-Загародскі Пінскага раёна. Найбольшага росквіту промысел дасягнуў у канцы XIX — першай палове XX ст. Выраблялі чорнаглянцаваны посуд гаспадарчага прызначэння: глякі (бунькі), збанкі, міскі, гладышы, макітры (макацёры), гаршкі з вушкамі, формы, кубкі, фігурныя кветнікі, вазоннікі.

Вырабы вызначаюцца буйнымі лаканічнымі формамі, суцэльна глянцаванай паверхняй, коса зрэзанымі венчыкамі місак і макітраў.

У пасляваенны час промысел заняпаў. Калекцыя пагост-загародскай керамікі 1920 — 1930-х гадоў зберагаецца ў Нацыянальным гістарычным музеі Рэспублікі Беларусь.