ЖУКОЙНІ-ЖАЛЯДСКІ КАСЦЁЛ МАЦІ БОЖАЙ ШКАПАЛЕРНАЙ размяшчаецца ў заходняй частцы вёскі Жукойні-Жалядскія Астравецкага раёна Гродзенскай вобласці на могілках. Пабудаваны ў 19 ст. з цэглы, перабудаваны ў 1928 г. Закрыты ў 1947 г., адноўлены ў 1990 г. 3 боку перад храмам пастаўлена драўляная чатырохгранная двух’ярусная званіца пад двухсхільным пакрыццём.

Помнік архітэктуры гістарызму. Трохчасткавую падоўжна-восевую кампазіцыю храма складаюць прамавугольныя ў плане аб'ёмы малітоўнай залы, апсіды і ніжэйшай сакрысціі. Двухсхільны дах асноўнага аб'ёму завершаны над фасадам васьмігранным шатровым драўляным барабанам, праз трохвугольныя застрэшкі пераходзіць у вальмавы над апсідай. Франтальны фасад вырашаны ўтрыраваным драўляным чатырохкалонным порцікам з трохвугольным франтонам. Плоскасныя бакавыя фасады рытмічна расчлянёны арачнымі аконнымі праёмамі з броўкамі і падваконнымі панэлямі, у апсідзе апяразаны гарадковымі фрызамі. Атынкаваныя і пабеленыя сцены кантрастуюць з паліхраміяй бутавай муроўкі цокаля.

Унутры памяшканні перакрыты адзінай плоскай столлю. У залу выступае антрэсоль хораў, падрыманая дзвумя слупамі. Драўляны галоўны і два бакавыя маляваныя алтары трактаваны ў стылі неабарока. Сцены і плафоны столі пакрыты арабескавай арнаментыкай. На левай сцяне апсіды навешана гранёная кафедра амбона.