ГЕРМАНІШКАЎСКІ КАСЦЁЛ НАЙСВЯЦЕЙШАЙ ТРОЙЦЫ размяшчаецца на ўсходняй ускраіне вёскі Германішкі Воранаўскага раёна. Пабудаваны ў 1909 г. з бутавага каменю. Закрыты ў 1965 г., вернуты парафіянам у 1987 г., асвячоны 17.06.2000 г. Абкружаны бутавай агароджай з трохпралётнай брамай.

Помнік архітэктуры неаготыкі. Да прамавугольнага ў плане асноўнага аб'ёму з фронта далучана трох’ярусная (васьмярык на двух чацверыках) шатровая званіца (надбудавана ў 1920-я гг.). Выцягнутая пяцігранная апсіда, аб'яднаная з асноўным аб'ёмам агульным дахам, мае бакавыя нізкія сакрысціі. На паліхромных сценах графічна вылучаюцца атынкаваныя і пабеленыя элементы архітэктурнага дэкору — прафіляваныя ліштвы стральчатых аконных праёмаў, карнізы і вуглавыя лапаткі.

У кутку бутавай агароджы касцёла капліца. Узведзена ў другой палавіне 19 ст. з цэглы. Помнік народнага дойлідства. Вырашана чатырохграннай вежай пад акруглым скляпеннем з крыжом у завяршэнні. Атынкаваныя грані раскрапаваны ў два ярусы прамавугольнымі нішамі, апяразаны трох’абломным карнізам.