НАВАГРУДСКІ КАСЦЁЛ I КЛЯШТАР ФРАНЦЫСКАНЦАЎ — помнік архітэктуры позняга барока ў горадзе Навагрудак Гродзенскай вобласці. Касцёл узведзены ў 1780 г., у 1846 г. перабудаваны ў псеўдавізантыйскім стылі ў Мікалаеўскую царкву.


Касцёл — 3-нефавая мураваная базіліка з 5-граннай апсідай. Галоўны фасад падзелены развітым антаблементам на 3 ярусы. Сцены цэнтральнага нефа расчлянёны пілястрамі, на галоўным фасадзе спараныя абапал высокага паўцыркульнага акна 2-га яруса і галоўнага ўвахода на 1-м ярусе, па абодва бакі іх неглыбокія нішы. 3-і ярус — невысокая вежа-званіца з купалком на 8-гранным барабане. Аконныя праёмы галоўнага фасада з паўцыркульным і арачным завяршэннем.

На поўнач ад касцёла 2-павярховы Г-падобны ў плане мураваны корпус кляштара. Галоўны фасад вырашаны ў лаканічных формах, прарэзаны прамавугольнымі аконнымі праёмамі. Трохнефавая базіліка з плоскім галоўным фасадам, вузкім нартэксам і паўцыркульнай апсідай, да якой з паўночнага боку далучана сакрысція. Галоўны фасад падзелены развітым карнізам на 2 ярусы і завершаны трохвугольным франтонам з вежачкай над ім. Тарцы даха бакавых нефаў закрыты ступеньчатымі атыкамі. Сцены аздоблены пілястрамі. Аконныя праёмы з лучковымі і арачнымі завяршэннямі. Надмагільныя пліты эштафіі 18 ст. са сцен пакладзены ў падлогу. У 1898 у касцёле нелегальна ўстаноўлена мемарыяльная дошка ў гонар А.Міцкевіча. Будынкі кляштара і школы не захаваліся.