ПРОШКАЎСКАЯ КАПЛІЦА СВЯТОГА ЯНА размяшчаецца на могілках у паўночнай частцы вёскі Прошкава Глыбоцкага раёна Віцебскай вобласці. Пабудавана ў 19 стагоддзі з дрэва. Адноўлена ў канцы 20 стагоддзя.

Помнік народнага дойлідства. Прамавугольны ў плане зруб з пяціграннай апсідай і бакавымі сакрысціямі. Двухсхільны гонтавы дах пераходзіць над апсідай у вальмавы гранёны. Над трохвугольным франтонам фасада ўзвышаецца двух’ярусная чатырохгранная вежа-званіца пад шатровым пакрыццём. Уваход праз нізкі прамавугольны прытвор пад двухсхільным пакрыццём. Гарызантальна ашаляваныя бакавыя фасады прарэзаны арачнымі аконнымі праёмамі ў разных ліштвах. Унутры зала перакрыта плоскай столлю. Над уваходам на ўсю шырыню храма балкон хораў, падтрыманы двумя слупамі. Цэнтральны і бакавыя алтары выкананы ў тэхніцы стука пад шэры штучны мармур.