ДЗЕРАЎНЯНСКІ КАСЦЁЛ УНЕБАЎЗЯЦЦЯ НАЙСВЯЦЕЙШАЙ ДЗЕВЫ МАРЫІ размяшчаецца ў цэнтры вёскі Дзераўная Стаўбцоўскага раёна Мінскай вобласці.

Мураваны храм заснаваны ў 1598 г. па фундацыі Мікалая Крыштофа Радзівіла і яго жонкі Галькі Эўфіміі Вішнявецкай паводле тэстаменту Эўфіміі Вярбіцкай (жонка валынскага ваяводы Андрэя Вішнявецкага). Верагодны будаўнік храма — віленскі канонік Войцех Сялява. У інвентары 1593 г. адзначаны ў стадыі будаўніцтва. У пачатку 17 ст. пераасвячоны на Прачысценскі касцёл, які ў другой палавіне стагоддзя набыў вежу на фасадзе, у пачатку 18 ст. адрэстаўрыраваны.

Помнік архітэктуры готыкі і рэнесансу. Храм аднавежавы, прамавугольны ў плане з паніжанай пяціграннай апсідай і прыбудаванымі да яе бакавымі прамавугольнымі сакрысціямі. Трох'ярусная (васьмярык на дзвух чацверыках) шатровая вежа ўзвышаецца над галоўным паўночным фасадам, яе вуглы ў ніжняй частцы ўмацаваны контрфорсамі, грані крапаваны высокімі арачнымі нішамі. Бакавыя сцены ўмацаваны контрфорсамі-пілонамі ў прасценках высока ўзнятых паўцыркульных аконных праёмаў.

Аднанефавая малітоўная зала перакрыта цыліндрычным скляпеннем на падпружных арках з распалубкамі над аконнымі праёмамі. Алтарная частка адкрываецца ў залу вялікім арачным прасветам. Нартэкс і сакрысціі перакрыты крыжовымі скляпеннямі. Над уваходам выступае галерэя хораў з арганам, падтрыманая чатырмя калонкамі. На хоры вядуць дзве бакавыя лесвіцы, размешчаныя ў тоўшчы сцен. Пад вокнамі — плоскія арачныя нішы.

Дэкаратыўна-мастацкае афармленне інтэр'ера ўключае тры алтары барочнай стылёвай трактоўкі, класіцыстычны амбон, галерэю гарэльефных пано-стацый, арнаментальны роспіс скляпенняў.