ГАЛЫНКАЎСКІ КАСЦЁЛ УЗВЫШЭННЯ СВЯТОГА КРЫЖА размяшчаецца ў цэнтры вёскі Галынка Гродзенскага раёна. Пабудаваны ў 1891 г. з цэглы як царква на месцы папярэдняга храма 1714 г. У аснову будынка пакладзены тыпавы праект № 14. У 1922 г. перароблены пад касцёл і асвячоны архібіскупам Рамуальдам Ялбжыкоўскім. Закрыты ў 1947 г., вернуты парафіянам і адноўлены ў 1989 г.

Помнік архітэктуры стылю неакласіцызму. Падоўжана-восевую крыжовую ў плане кампазіцыю храма фарміруюць шырокі нартэкс з двух'яруснай чацьверыковай званіцай над ім, неф з бакавымі крыламі трансепта, прамавугольная апсіда, да бакоў якой далучаны драўляныя сакрысціі. У завяршэнні пакатага чатырохсхільнага даху цэнтральнага аб'ёму невялікі чацверыковы барабанчык з шатровьім пакрыццём. Над званіцай узведзена шатровая каркасная вежачка-ліхтар. Фасады прарэзаны адзінарнымі і здвоенымі арачнымі аконнымі праёмамі ў вялікіх прафіляваных ліштвах, апяразаных прафіляваным карнізам, Тарцы аб'ёмаў завершаны трохвугольнымі франтонамі. Прамавугольны ўваходны праём аформлены арачным парталам і завершаны паўкруглай люкарнай.

Унутры ў сяродкрыжжа храма, перакрытае самкнутым чатырохгранным купалам, лучковымі аркамі адкрываюць апсіда і крылы трансепта. У інтэр'еры тры алтары ў стылі неакласіцызму. Цэнтральны трох'ярусны алтар узняты на шырокі пастамент і фланкіраваны скульптурамі святых апосталаў Пятра і Паўла. У левым кутку прэсбітэрыя на слупе ўзняты гранёны амбон. Пры ўваходзе драўляныя хоры на двух васьмігранных слупах.