ГРАНДЗІЦКАЯ КАПЛІЦА СВЯТОГА РОХА размяшчаецца ў цэнтры вёскі Грандзічы Гродзенскага раёна. Пабудавана ў 1906—10 гг. з цэглы на месцы драўлянага храма (адзначаны ў 1840 г.) паводле праекта гродзенскага губернскага архітэктара У.А.Срокі. Закрыта ў 1961 г. (прыстасавана пад склад), вернута ў 1990 г., адбудавана ў 1992 г., перабудавана ў 2002—2003 гг. Прыпісана да Гродзенскага фарнага касцёла.

Помнік архітэктуры неаготыкі. Кампактны прамавугольны ў плане будынак пад двухсхільным дахам з вальмамі над трохграннай апсідай. Бакавыя прамавугольныя крылы трансепта пад вальмавымі дахамі дабудаваны ў канцы 20 ст. У шчыпец галоўнага фасада ўбудавана чатырохгранная вежачка для звона і крыжа. Элементы архітэктурнага дэкору — стральчатыя нішы, вокны і праёмы, двухступеньчатыя контрфорсы — выкананы якаснай адкрытай муроўкай з жоўтай цэглы. Над уваходам навісае балкончык, злучаны дзвярамі-акном з хорамі.

Малітоўная зала перакрыта стральчатым, апсіда самкнутым корабавым скляпеннямі. У ёй пастаўлены невялікі драўляны неагатычны алтар, па баках якога стральчатыя акенцы, запоўненыя каляровымі сюжэтнымі вітражамі. Антрэсоль хораў узнята пад скляпенне шырокім арачным прасветам, амбежавана рэльефнай балюстрадай.