ГРОДЗЕНСКАЯ КАПЛІЦА СВЯТЫХ АПОСТАЛАЎ ПЯТРА І ПАЎЛА размяшчаецца ў занёманскай частцы горада Гродна па вуліцы Рэпіна. Была пабудавана ў 1818—21 гг. з цэглы па фундацыі графа Кароля Медэма пры сядзібна-паркавай рэзідэнцыі маёнтка Аўгустова, пажалаванага ў 1797 г. генералу ад інфантэрыі графу Маўрыкію Пятровічу Дэ Ланці. З'яўлялася фамільным маўзалеем-пахавальняй, была прыпісана да касцёла Маці Божай Анёльскай францысканскага кляштара г. Гродна. Па ідэі фундатара капліца павінна была нагадваць сабор святога Пятра ў Рыме. Зруйнавана разам з сядзібай у Першую сусветную вайну (1915). Адноўлена ў 1996—98 гг. паводле праекта, распрацаванага архітэктурна-канструктарскім бюро С.Шэйко.

Помнік архітэктуры класіцызму. Цэнтрычнае квадратнае ў плане збудаванне, накрытае паўсферычным купалам з ліхтаром з крыжом. Па перыметры кубападобны аб'ём акаймаваны дарычным (трыгліфным з метопамі) фрызам і карнізам на дэнтыкулах. Метопы запаўняліся ўтопленым у рошчыну рознакаляровым шчэбнем, што стварала маляўнічы пояс на фоне белай тынкоўкі сцен. Прамавугольны ўваходны партал размешчаны ў нішы, фланкіраванай дзвюма калонамі; па баках паўкруглыя люкарны. Зала капліцы (першапачаткова мела форму ратонды) перакрыта сферычным купалам, сцены крапаваны НІША - нішамі-экседрамі, прасценкі — канелюраванымі пілястрамі. У алтары быў размешчаны абраз «Маці Божая», па баках якога стаялі скульптуры святых апосталаў Пятра і Паўла ў поўны рост. Пад капліцай крыпта, у якой былі пахаванні рода Ланці. Капліца акаймавана мураванай агароджай з брамай-званіцай (двух'ярусная з лучковым праездам і прамавугольнымі прасветамі яруса-звона).