ІВАНАЎСКІ КАСЦЁЛ УЗВЫШЭННЯ СВЯТОГА КРЫЖА размяшчаецца ў цэнтры горада Іванава Брэсцкай вобласці. Пабудаваны ў 1848 г. з цэглы намаганнямі ксяндза К.Палівона, асвячоны ў 1852 г. біскупам В.Жылінскім.

У 1899 г. адрамантаваны на ахвяраванні прыхаджан. На 1935 г. налічваў каля 1450 парафіян. Меліся філіяльныя могілкавыя капліцы ў горадзе і вёсках Баландзічы і Моладава. У савецкі час быў прыстасаваны пад Дом культуры. Адноўлены ў 1990-я гг., акаймаваны мураванай агароджай з цэнтральнай брамай і бакавымі трох’яруснымі купальнымі вежамі.

Помнік архітэктуры ампіру. Прамавугольны ў плане (22,5 х 12,5 м) будынак пад двухсхільным дахам на галоўным фасадзе завершаны трохступеньчатым атыкам, раскрапаваны пілястрамі абапал уваходнага партала з арачнай люкарнай над ім. Пілястрамі крапаваны і бакавыя фасады, расчлянёныя на два ярусы прамавугольнымі аконнымі праёмамі. Будынак акаймаваны антаблементам з прафіляваным карнізам на дэнтыкулах. У інтэр'еры зала перакрыта плоскай столлю, апсіда вылучана бакавымі сакрысціямі. Пры ўваходзе галерэя арганных хораў на двух калонах.