КРОШЫНСКІ КАСЦЁЛ БОЖАГА ЦЕЛА разшмяшчаецца каля могілак у заходняй частцы вёскі Крошын Баранавіцкага раёна Брэсцкай вобласці. Пабудаваны ў 1920-я гг. з цэглы ў маёнтку Радзівілаў на месцы касцёла 1818 г. У храме быў размешчаны музей беларускага паэта П.Багрыма (1813—1891 гг.), які нарадзіўся ў Крошыне і вучыўся ў мясцовай парафіяльнай школе, заснаванай ксяндзом В.Малішэўскім (пахаваны на могілках). У цокалі храма вапнавыя квадры з імёнамі фундатараў (Я.Касакоўскі, памёр 03.03.1901 г.; М.Пашкевіч і інш.).

Помнік архітэктуры мадэрна. Прамавугольны ў плане, узняты на высокі цокаль будынак з пашыранай алтарнай часткай і прамавугольнай апсідай-рызалітам, завершанай двухгранным шчытом. Фасад прарэзаны па цэнтры высокай і глыбокай арачнай нішай, фланкіраванай лапаткамі і прамавугольнымі нішамі. У завяршэнні фасада высокі прамавугольны атык з двухгранным шчытом і вуглавымі чатырохграннымі пінаклямі; па цэнтры рэльефная выява крыжа. Двухсхільны дах з вальмай над апсідай завершаны вытанчанай васьміграннай шатровай сігнатуркай. Бакавыя фасады рытмічна расчлянёны прамавугольнымі аконнымі праёмамі з арачнымі броўкамі. Атынкаваныя і пабеленыя фасады кантрастуюць з паліхромнай муроўкай магутнага цокаля вапнавымі квадрамі.

У інтэр'еры апсіда адкрыта ў неф арачным прасветам і асветлена тарцовай паўкруглай люкарнай. Памяшканні перакрыты цыліндрычнымі скляпеннямі, з якіх у цэнтры залы звісае бронзавая жырандоля, якую, як лічыцца, выконваў Паўлюк Багрым. Пры ўваходзе галерэя хораў. Абраз 19 ст. «Апостал».