ЛЕПЕЛЬСКІ КАСЦЁЛ СВЯТОГА КАЗІМІРА размяшчаецца на паўночнай ускраіне горада Лепель Віцебскай вобласці, акаймаваны металічнай агароджай на мураваных слупах. Пабудавана ў 1857—76 гг. з цэглы на сродкі мясцовага абывацеля Мальчэўскага. 3 1990-х гг. дзейнічае.

Патрон касцёла Л.Сапега ў 1604(9) г. асадзіў тут манахаў ордэна бернардзінцаў, касцёл якіх фундаваны ў 1650 г. Двойчы (у 1770 і 1833) гарэў.

Помнік архітэктуры позняга класіцызму. Належыць да тыпу базілікальных трохнефавых двухвежавых храмаў з трансептам. Аб'ёмы нефаў, сакрысцій, крылаў трансепта складаюць ступеньчатую кампазіцыю, дамінантамі якой з'яўляюцца каркасныя чатырохгранныя вежы фасада з высокімі арачнымі прасветамі. Цэнтр галоўнага фасада вылучаны рызалітам з трохвугольным франтонам, дэкарыраваны лапаткамі і карнізамі з сухарыкамі, фігурнымі філёнгамі вакол круглых люкарнаў. Бакавыя фасады рытмічна расчлянёны арачнымі аконнымі праёмамі.

Унутры цэнтральны неф перакрыты цыліндрычным скляпеннем на распалубках і падпружных арках, бакавыя — крыжовымі; сцены крапаваны пілястрамі і апяразаны прафіляваным карнізам. Над уваходам высока ўзнятая на трохпралётную аркаду антрэсоль хораў. На алтарнай сцяне абразы «Ісус Хрыстос» і «Святы Казімір», у левым бакавым алтары абраз «Маці Божая Вастрабрамская».