ЛУЧАЙСКІ КАСЦЁЛ СВЯТОГА АПОСТАЛА ЮДЫ ТАДЭВУША размяшчаецца ў цэнтры вёскі Лучай Пастаўскага раёна Віцебскай вобласці. Пабудаваны ў 1766—76 гг. з цэглы як езуіцкі (віленская калонія ў 1731—73 гг.) па фундацыі ўладальніка маёнтка Т.Агінскага і яго жонкі Эльжбеты (з Пузынаў). Аўтарства храма прыпісвалася архітэктарам Т.Жаброўскаму ці К.Спампані, апошнія даследаванні называюць праектантам Г.Лянкевіча. У першай палавіне 19 ст. часткова перабудаваны: прыўнесена ордэрная пластыка, размаляваны інтэр'ер, створана мураваная агароджа з трохпралётнай брамай. Пасля 1948 г. быў закрыты, вернуты парафіянам 16.03.1990 г.

Помнік архітэктуры з рысамі барока і класіцызму. Дзвюхвежавая трохнефавая купальная базіліка з паўцыркульнай апсідай і трансептам. Галоўны фасад фланкіруюць трох’ярусныя вежы, раскрапаваныя вуглавымі пілястрамі, нішамі, прарэзаны прамавугольнымі аконнымі праёмамі. Пры перабудове верхні ярус вежаў завершаны купальнымі ратондамі. Галоўны фасад, апсіду і трансепт вянчаюць лучковыя і фігурныя шчыты. Сцены раскрапаваны пілястрамі, якія нясуць антаблемент дарычнага ордэра.

Інтэр'ер вырашаны ў насычанай архітэктурнай пластыцы дарычнага ордэра. У цэнтральным нефе скляпенні цыліндрычныя з распалубкамі, у бакавых — крыжовыя, над сяродкрыжжам — сферычны купал. Ордэрную пластыку дапаўняюць насычаныя размалёўкі ў тэхніцы грызайль. Ніжняя частка купала запоўнена перспектыўнай архітэктанічнай кампазіцыяй. У люнетах цэнтральнага нефа — маляваныя васьмігранныя плафончыкі. На ветразях, тарцовых сценах трансепта і ў консе апсіды — выявы евангелістаў, святых і анёлаў. Сцены бакавых нефаў дэкарыраваны фрэскавай размалёўкай, якая імітуе скульптурны рэльеф. Гэтак жа выканана размешчанае над уваходам пано-картуш з выявамі двух воінаў са шчытамі і воінскімі атрыбутамі. Над уваходам на трайной аркадзе — хоры, на якіх устаноўлены арган. У сакрысціі меліся партрэты 18 ст. Э.Агінскай і А.Пузыны.