ЛУННАЎСКІ КАСЦЁЛ СВЯТОЙ ГАННЫ размяшчаецца ў цэнтры вёскі Лунна Мастоўскага раёна Гродзенскай вобласці. Пабудаваны ў 1782 г. з цэглы. У 1895 г. фундаментальна перабудаваны з бутавага каменю акрамя апсіды.

Помнік архітэктуры неакласіцызму. Прамавугольны ў плане аб'ём пад двухсхільным дахам з пяціграннай апсідай. Архітэктурныя дэталі (ліштвы, карнізы, акантоўка лапатак) пабелены і графічна вылучаны на паліхромным фоне бутавай муроўкі. Складаную трактоўку атрымаў трохвугольны франтон галоўнага фасада, у які ўкампанаваны плоскі ўтрыраваны пілястравы порцік з самастойным франтонам. Уваход вылучаны лучковым парталам і арачным аконным праёмам хораў над ім.

Выцягнутая па падоўжнай восі малітоўная зала падзелена высокімі драўлянымі слупамі (размалёўка імітуе мармуровыя калоны) на тры нефы. Цэнтральны з іх перакрыты драўляным цыліндрычным скляпеннем і аб'яднаны ім з конхавай апсідай. Спалучэннем з плоскай столлю бакавых нефаў у чатырохсценным аб'ёме створана развітая прастора, арганізацыя якой нагадвае старадаўнія каталіцкія базілікі. Ускладняюць інтэр'ер галерэі бакавых сакрысцій і хораў. Мастацкае афармленне дапаўняе размалёўка арнаментальнага фрыза з поясам аб'яднаных гірляндамі медальёнаў, падпружных арак, плафонных разетак. У інтэр'еры сем драўляных неагатычных разных алтароў. Абразы 19 ст. ў стылі акадэмічнага класіцызму «Архангел Міхаіл», «Маці Божая Вастрабрамская», «Маці Божая Адзігітрыя».