Помнік архітэктуры
неаготыкі. Прамавугольны ў плане неатынкаваны аб'ём пераходзіць у ніжэйшую пяцігранную апсіду. Накрыты двухсхільным дахам, які па цэнтры
вільчыка і над
апсідай фланкіраваны чацверыковымі шатровымі сігнатуркамі-фіяламі. Будынак узняты на высокі цокаль, выкладзены з буйных вапнавых блокаў, на якіх змешчаны імёны фундатараў і ахвяравальнікаў. На галоўным фасадзе ўзвышаецца двух’ярусная
званіца (чацвярык на васьмерыку), завершаная высокім шатром. Фасады прарэзаны
вітражнымі вокнамі-біфорыумамі з «ружамі» ў агульных стральчатых, выкладзеных лякальнай цэглай
ліштвах; дэкарыраваны аркатурнымі паясамі, круглымі разеткамі-трохліснікамі, раскрапаваны лапаткамі. Галоўны і два бакавыя ўваходы аформлены стральчатымі перспектыўнымі парталамі.
Унутры зала размежавана слупамі на тры
нефы, перакрытыя крыжовымі скляпеннямі. Над уваходным трохгранным эркерам
антрэсоль хораў. Галоўны і бакавыя драўляныя
алтары,
амбон выкананы ў стылі неаготыкі. Тымпан стральчатай аркі прэсбітэрыя запоўнены сюжэтным роспісам «Хрыстос з прадстаячымі». Уздоўж сцен навешаны гіпсавыя пано-стацыі на тэму «Хрэсны ход».
