РАДАШКОВІЦКІ КАСЦЁЛ НАЙСВЯЦЕЙШАЙ ТРОЙЦЫ размяшчаецца ў паўднёва-ўсходняй частцы гарадскога пасёлка Радашковічы Маладзечанскага раёна Мінскай вобласці на вуліцы Савецкай. Пабудаваны ў 1850 годзе з цэглы.

Першы каталіцкі храм тут заснаваны ў 1447 годзе віленскім кашталянам Пятром Гедыгольдавічам. У 1734 годзе быў пабудаваны новы касцёл. У існуючым касцёле хрысцілі Янку Купалу. Закрыты ў 1946 годзе і прыстасаваны пад вытворчы корпус. У 1990 годзе перададзены вернікам. Перад касцёлам размешчана трохарачная брама з лучковым франтонам і паўкалонамі на фасадзе.

Помнік архітэктуры позняга класіцызму. Трохнефавая двухвежавая базіліка з паўкруглай апсідай і бакавымі сакрысціямі. Асноўны, прамавугольны ў плане аб'ём накрыты двухсхільным дахам з невялікім ліхтаром, выцягнутая па падоўжнай восі апсіда — больш нізкім двухсхільным дахам. Цэнтр сіметрычнага галоўнага фасада вылучаны глыбокім рызалітам і завершаны двухсхільным шчытом. Квадратныя ў сячэнні чатырох’ярусныя вежы выступаюць з асноўнага аб'ёму, дэкарыраваны скразнымі арачнымі праёмамі, круглымі люкарнамі, завершаны шлемападобнымі купаламі. Бакавыя плоскасныя фасады рытмічна члянёны высокімі арачнымі аконнымі праёмамі з броўкамі і шырокімі пілястрамі ў прасценках.

Унутраная прастора члянёна двумя радамі квадратных у сячэнні слупоў на тры нефы, перакрытыя ажурнай повяззю скляпенняў — цыліндрычным у цэнтральным, крыжовымі ў бакавых нефах, конхай у апсідзе. Сцены крапаваны пілястрамі, на якія абапіраюцца магутныя падпружныя аркі, буйнымі карнізамі. У нартэксе галерэя хораў, на якіх быў арган. Часткова захавалася керамічная арнаментаваная падлога ў апсідзе.