РАЖАНКАЎСКІ КАСЦЁЛ СВЯТЫХ АПОСТАЛАЎ ПЯТРА І ПАЎЛАГалоўная »
РАЖАНКАЎСКІ КАСЦЁЛ СВЯТЫХ АПОСТАЛАЎ ПЯТРА І ПАЎЛА размяшчаецца на могілках на паўночнай ускраіне вёскі Ражанка Шчучынскага раёна Гродзенскай вобласці. Пабудаваны ў 1674 годзе з цэглы і бутавага каменю. Перабудаваны ў 1827 годзе па загаду сенатара Каралеўства Польскага Людзвіка Паца паводле праекта архітэктара Генрыка Марконі. Аднаўляўся ў 1924—25 гадах. Перад касцёлам стаяла аркадная званіца, з левага боку — плябанія. Капітальна адрамантаваны і адкрыты ў 1990 годзе.
![](/_si/19/s71480615.jpg)
Помнік архітэктуры рэтраспектыўна-гатычнага стылю. Адна нефавы крыжападобны ў плане храм з больш нізкімі пяціграннай апсідай і крыламі трансепта. Тарцы высокіх двухсхільных дахаў над нефам і крыламі трансепта закрыты ступеньчатымі шчытамі. Да паўднёва-заходняга вугла нефа прыбудавана трох’ярусная вежа ( васьмярык на двух чацверыках), накрытая васьмігранным спічастым шатром. Вуглы асноўнага аб'ёму ўмацаваны контрфорсамі і завершаны дэкаратыўнымі фіяламі. Бакавыя фасады прарэзаны стральчатымі аконнымі праёмамі з узорыстымі вітражамі. У цэнтры галоўнага фасада круглае акно-ружа, вышэй — арнаментальна-гафрыраваны фрыз і шчыт, крапаваны дробнай аркатурай з гербам па цэнтры. Уваход аформлены перспектыўным парталам, па баках якога стральчатыя экседры са скульптурамі святых апосталаў Пятра і Паўла (не захаваліся).
Унутраная прастора касцёла перакрыта цыліндрычным скляпеннем з распалубкамі, крылы трансепта — крыжовымі. Апсіда і крылы трансепта раскрываюцца ў прастору нефа арачнымі прасветамі. Над уваходам на трохпралётнай стральчатай аркадзе ўзняты хоры, на якія вядзе вітая лесвіца ў таўшчыне сцяны. Сцены нефа расчлянёны пілястрамі і размаляваны ў верхняй частцы шматфігурнымі кампазіцыямі на біблейскія тэмы. На вуглавым пілоне апсіднай аркі навешаны амбон.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|