ЗАСЛАЎСКАЯ КЕРАМІКА – кухонны, сталовы і тарны посуд 10 —18 ст., знойдзены пры археалагічных раскопках Заслаўя і Заслаўскага курганнага могільніка. У 10 — 14 ст. выраблялі пераважна гаршкі, якія выкарыстоўваліся для гатавання ежы, хавання прадуктаў, а таксама ў якасці пахавальных урн у абрадах трупаспалення. Міскі і гліняныя накрыўкі таго часу прадстаўлены адзінкавымі знаходкамі. Посуд выраблялі з грубай з дамешкам жарствы або з якаснай глінянай масы, абпальвалі пры тэмпературы 850 — 1050 °С, аздаблялі лінейным рыфленнем, адна- ці шматрадковымі хвалістымі лініямі або зігзагамі, касымі або прамымі насечкамі і інш. У 10 ст. арнаментавалі часцей усё тулава, пазней — частку ад шыйкі да сярэдзіны тулава або толькі «плечукі» пасудзіны (у некаторых дэкарыравалі толькі венчык). Уся заслаўская кераміка выраблена на ганчарным крузе, толькі нязначная колькасць посуду 10 ст. вылеплена рукамі.

У 15 — 18 ст. асартымент посуду значна пашырыўся. Выраблялі гаршкі, макатры, патэльні, міскі, талеркі, кубкі, чаркі, глякі, чайнікі і іншы посуд. Танкасценны сталовы посуд выраблялі на нажным ганчарным крузе з высакаякаснай глінянай масы. Унутраную паверхню большасці вырабаў пакрывалі палівай, знешнюю аздаблялі ангобам; некаторыя вырабы палівалі звонку і знутры. Дэкарыравалі пераважна верхнюю частку посуду лінейным або хвалістым арнаментамі, валікамі, зашчыпамі, прымянялі арнаменты-штампы; талеркі і часткова міскі распісвалі разнаколернымі палівамі, а ў канцы 17 — 18 ст. эмалямі. Некаторыя вырабы аздаблялі рэльефным кветкавым арнаментам.

З 18 ст. пашырыўся выраб чорназадымленага кухоннага сталовага посуду. Арнамент на яго наносіўся лашчэннем, у некаторых вырабах глянцавалася ўся вонкавая паверхня. Для заслаўскай керамікі 16 — 18 ст. характэрны стандартызацыя і уніфікацыя некаторых форм посуду, блізкасць да мінскай керамікі.