Асноўны фонд музейнага комплексу (2008) налічвае больш за 2000 адзінак захоўвання, дапаможны — 300 адзінак. Займае агульную плошчу 200 га.
Уключае экспазіцыйныя і выставачныя залы музея матэрыяльнай культуры, працуючыя кузню, ганчарную і рэстаўрацыйныя майстэрні, дрэваапрацоўчы цэх, пякарню, сыраварню, мукамольны цэх (
вятрак), пчальнік, стайню, жывёлагадоўчую ферму,
корчмы, невялікі заезны дом і славянскі
бровар з арыгінальнымі хатнімі напіткамі. Ёсць таксама этнаграфічная галерэя, дзе экспануюцца прадметы сялянскага побыту, сельскагаспадарчая тэхніка 19 — пачатку 20 ст. Прадпрыемства ўтрымлівае коней англа-будзёнаўскай, араба-тракененскай, арлоўскай, кустанайскай, латышскай парод. Наведвальнікаў вучаць ездзіць вярхом, запрагаць фаэтон, шарабан, сані-розвальні. У заасадзе ўтрымліваюцца каровы, бычкі, авечкі, козы, свінні, дзікі і іншыя звяры, птушкі (дэкаратыўныя і хатнія куры, качкі, гусі, індыкі, галубы, афрыканскія страусы). Комплекс займаецца і раслінаводствам — штогод засяваюць 37 га аўсом, жытам, рапсам, кармавымі культурамі, што ідуць на ўнутраныя патрэбы. Для прыгатавання традыцыйных страў у кавярні і корчмах выкарыстоўваюцца капуста, агуркі, буракі, морква, часнок, зеляніна з уласнага агароду.
У музеі 2 выставачныя залы. Першая адкрыта ў 2001 г. У ёй створаны экспазіцыі, прысвечаныя развіццю рамёстваў і промыслаў у Беларусі, перш за ўсё ткацтва. Адлюстраваны працэсы вытворчасці і тэхнічнай апрацоўкі
лёну, вырабу льнянога валакна, нітак, даматканага палатна, ручнікоў, посцілак,
абрусоў,
дываноў. Тут жа прадстаўлены калекцыйны збор
адзення,
абутку, тканых паясоў,
галаўных убораў, прывезеных з вёсак у час экспедыцый. Экспазіцыі маюць раздзелы ў адпаведнасці з напрамкамі работы цэхаў і майстэрняў музея. Таксама прадстаўлены раздзел па гісторыі стварэння прадпрыемства «Паліфакт» як заснавальніка музея. Асобае месца адведзена мемарыяльнаму кутку роду Ельскіх — уладальнікаў гэтай зямлі ў 19 ст., дзе змешчаны фатаграфіі членаў сям'і з альбома, якія перадала музею прапраўнучка А.Ельскага Г.Завідская з Варшавы. Ёсць таксама копіі літаратурных прац А.Ельскага з Ягелонскай бібліятэкі г.Кракаў і нотныя зборнікі музычных твораў сям'і Ельскіх. У другой зале прадстаўлены працы майстроў музея, дыпломныя і курсавыя работы студэнтаў факультэтаў дэкаратыўна-прыкладнога мастацтва ВНУ Мінска. На тэрыторыі музейнага комплексу ў 2008 г. пабудаваны праваслаўны храм у гонар святога прарока Іаана Хрысціцеля. У комплексе жадаючыя могуць прыняць удзел у працэсе вытворчасці: вырабіць і абпаліць
гаршчок, выкаваць падкову або качаргу, збіць масла, сплесці з саломы сувенір, а таксама пракаціцца фурманам у конным экіпажы, узараць участак зямлі, пакасіць траву, падаіць карову або казу і інш.
Музей праводзіць экскурсіі, фэсты старасвецкай культуры, спаборніцтвы майстроў Беларусі «Залатая падкова», «Мелодыі гліны», конкурс
выцінанкі «Ажурныя фантазіі», святы народнага календара —
Каляд, Масленіцы,
Гукання вясны,
Зажынак,
Дажынак і інш. Арганізуюцца вернісажы сумесна з Саюзам мастакоў Беларусі, літаратурныя чытанні з саюзамі пісьменнікаў і журналістаў Беларусі, музычныя вечары старадаўняй музыкі — з Беларускай капэлай і іншыя мерапрыемствы.