ЗАДАРОЖСКІ КАСЦЁЛ НАЙСВЯЦЕШАЙ ДЗЕВЫ МАРЫІ размяшчаецца за 1 км на захад ад вёскі Задарожжа (Мнюта) Глыбоцкага раёна Віцебскай вобласці. Пабудаваны ў 1910 г. з цэглы. Абкружаны бутавай агароджай з трох’арачнай брамай і вуглавой двух’яруснай шатровай званіцай. Храм адлюстраваў у сваім малюнку Язэп Драздовіч.

Помнік архітэктуры неаготыкі. Магутная трохнефавая базіліка з пяціграннай апсідай і бакавымі сакрысціямі. Галоўны фасад фланкіраваны двух’яруснымі чатырохграннымівежамі са шпілямі, паміж імі атыкавая сцяна з двухгранным шчыпцом. Вось сіметрыі фасада адзначана ўваходным стральчатым парталам і акном-біфорыумам над ім. Сцены рытмічна расчлянёны ступеньчатымі контрфорсамі ў прасценках высокіх стральчатых аконных праёмаў, апяразаны аркатурнымі фрызамі.

Прастора інтэр'ера расчлянёна на нефы стральчатымі аркадамі на чатырохгранных пілонах, перакрыты стральчатымі скляпеннямі. Перспектыва цэнтральнага нефа завершана неагатычным алтаром, на прадалтарным пілоне навешаны прамавугольны амбон. Над уваходам хоры. Абраз «Маці Божая Беззаганнага Зачацця» (17 ст.), партрэт караля Жыгімонта ІІІ (1601 г.).